Emmanuel Pierre se yon ajan devlòpman kominotè eksepsyonèl, konsiltan jèn, ak lidè jèn ki soti nan vil Jakmèl, peyi Ayiti. Li ap jwe yon wòl enpòtan nan devlòpman kominotè depi 2006. Nan ane 2008, li kòmanse travay ak timoun nan kominote defavorize yo ak vizyon pou genyen yon gran kay ak espas ki kapab akeyi timoun soti nan tout kalite touch nan sosyete a. Vizyon sa a mennen kreyasyon òganizasyon ki rele Pitit Kay Ayiti. Se yon òganizasyon ki vize pou akeyi timoun ki pa gen kay.

Nan mwa jiyè 2014, Emmanuel òganize premye kan dete li, ki te gen anviwon 80 timoun ki te patisipe. Siksè evènman sa a mennen lansman Pitit Kay Ayiti.Yon lane apre an 2015, Emmanuel òganize dezyèm kan dete li, ki te akeyi plis pase 200 timoun. Pandan kan sa a, timoun yo aprann kijan pou pwoteje anviwònman, pase tan nan etid labib, ak resevwa fòmasyon sou pwoteksyon kont abiz seksyèl.

Nan menm ane sa a, Emmanuel elaji sipò li a yon varyete objektif. Li travay nan peye lekòl pou timoun, kreye atelye travay pou montre timoun yo fè evanjelizasyon, ak fòme kèk nan jèn yo pou yo vin lidè pou pouswiv travay ak timoun yo.

Nan 2017, Emmanuel vire atansyon li sou yon gwoup timoun nan kominote Lamontay ki andeyò vil Jakmèl, Ayiti. Kominote sa a pa gen yon nivo edikasyon ki wo pa rapò ak gran vil yo. Estatistik yo revele sis(6) sou chak dis(10) timoun ekspoze a vyolans. Objektif Emmanuel pou travay sa a Klè kou duo kòk :

• Sipòte timoun yo nan edikasyon yo, ede yo jwenn zouti lekòl yo, ak peye frè lekòl yo,

• Kreye aktivite lwazi pou ede yo grandi nan bon jan anviwònman sosyal,

• Montre yo kòman pou pwoteje anviwònman yo.

Emmanuel rive sipòte divès aktivite Pitit Kay Ayiti pandan plis pase 7 lane, gras a sipò finans limite manm fanmi li yo, zanmi yo, ak pwòp resous pèsonèl li. Jodi a, Pitit Kay Ayiti kontinye peye lekòl pou plis pase 50 timoun. Òganizasyon an ofri timoun yo kou mizik ak lòt aktivite edikatif, yon sous bonè ak lajwa pou timoun yo. Lidè yo ap travay san pran repo pou chanje lavi timoun yo, pote lespwa malgre yo ap viv nan yon anviwònman kote timoun yo ap fè fas kare ak move lavi chat jou epi lavni chaje ak enkyetid.

Motivasyon ak detèminasyon Emmanuel Pou Pitit Kay Ayiti pote appli pwogrè enpòtan pou òganizasyon an ak timoun yo ki jwenn anpil benefis malgre defi li ap fè fas. Emmanuel kontinye travay san pran souf pou kreye yon bèl avni pou timoun yo. Pitit Kay Ayiti se yon refij pou tout pitit tè Ayiti kote yap resevwa edikasyon, sipò, ak lanmou, ki ap pèmèt yo grandi ak viv yon lavi ki byen ranpli.